Isch es denn überhaupt a Abteilung?

Also wenn i mir des jetzat so recht überleg, no isch dui Theatergruppe jo eigendlich koi richtige Abteilung em Verei.

Des isch meh so a "Asammlong von a paar Dubbl" die em Herbscht nex besseres z'doa hent wia sich entweder bei oim drhoim oder friher sogar em Kendergarda zom dreffa ond so a dubbeliges Theaterstückle ei zu schduduira.

Ja ond des beschde isch jo no. -> Dia machet des freiwillig. Ond dia kriaget net amol ebbes drfür. Also a Geld moin i do jetzt. I moin, wenn a Schwob ebbes omsonscht macht, no stemmt doch scho mol ebbes net. Oder?

Woisch, dann schdandet dia em Winder uf'd Biehne nuff ond spielat do so Gschichtla mit viele schlüpfige Verwechslonga ond so henderfezige Bäuerla ond ihre herrschsüchtige Weiber. Als wärs des echte Leba. Mr glaubts net, do schwätzt doch d'Nochbrschaft driber. Aber des macht denne nex.

Was jo dann au no drzua kommt isch, das a paar von denne net amol Schwoba send. Dia send aus dr Stadt!! Des musch dr amol vorschdella. Spielet an Schwob ond schwätzet em Gschäft noch dr Schrift.

Wie ihr glaubet des net? Ha no müsset ihr mol dia Bilder a'gugga wo em Karle sei Freind heimlich zom Kuchefenster neifodografiert hot. Ond no kennet ihr mir mol saga was ihr drvon haldet....

Also wenn'r wellet, ich han middlerweile au son an Compiudr - den hot em Eugen sei jonger nemme braucht, der hotn mir no geschenkt. Naja, egal, jedafalls ka i au so Mähls agugga, wenn ihr se schreibet.


Hier könnte Text stehen der am unteren Ende der Webseite angezeigt wird